Þessa dagana eru þemadagar í MS. 1. bekkingar fóru í morgun á söguslóðir Eglu. Mig langar að segja í stuttu máli frá deginum.
Að lokinni skemmtilegri leiðsögn nútíma hljóðstokks [iPod inns. Nútímavæðing Íslenskunnar ehf] um Landnámssetrið í Borgarnesi hélt hópurinn í Rauðanes að skoða hvar Skalla-Grímur Kveld-Úlfsson hafði reist sér smiðju. Í Eglu segir að Skalla-Grímur hafi hvergi fengið hentugan stein í smiðjuna svo hann gerði sér lítið fyrir og réri út á Borgafjörðinn og sótti sér hentugan stein sem var svo stór að fjórir menn gátu loftað honum. Fjórir aflmenn úr mínum hóp gerðu heiðarlega tilraun til að lofta steininum en varð ekki kápan úr því klæðinu. Við kennum frostinu um því jörðin var frosinn og okkur var heldur ekkert sérstaklega heitt að standa þarna úti í rokinu.
Að lokinni annarri tilraun til að lofta steininum játuðum við okkur sigruð og ákváðum í staðinn að freista þess að finna fjársjóð Skalla-Gríms sem hann gróf í Krumskeldu. Við keyrðum upp Borgarfjörðinn að Hvítárbrúnni, en hvergi fundum við kelduna. Fararstjórarnir ákváðu að hætta leitinni og snúa til baka í Borgarnes.
Það reyndist afdrifarík ákvörðun að fara aðra leið til baka. Fara gamla þjóðveginn upp á þann nýja. Vegurinn hafði greinilega farið á flot og vatnið hafði frosið yfir veginum, en greinilega höfðu einhverjir farið þarna því spor voru í götunni svo bílstjórinn keyrði öruggur af stað inn á afleggjarann.
Við fundum að það varð þyngra og þyngra að keyra í gegnum klakann en svo byrjaði rútan allt í einu að halla. Við vorum komin út af veginum. Bílstjórinn stöðvaði rútuna og sendi alla út til að freista þess að létta bílinn og ná honum aftur upp á veg. Þegar hann bakkaði bílnum aftur fór hann bara enn lengra út af og þar sem hann staðnæmdist var eitt hjólið á lofti og rútan við það að velta.
Þá var send eftir okkur rúta úr Borgarnesi til að koma okkur þangað og önnur rúta var kölluð frá Reykjavík til að koma okkur til Borgarinnar.
Að lokum komumst við þó heilu og höldnu til okkar heima, þrátt fyrir að afturganga Skalla-Gríms hafi reynt að stöðva för okkar við Hvítárbrúnna.